Demat deoc’h holl,
Ne rae nemet kregiñ ma beaj, met siwazh n’on ket evit kendec’hel ganti. Paket on gant ur gudenn yec’hed, ha ret eo din distreiñ er vro.
N’en do padet ar veaj neuze a-boan ur miz, met e giz-se ‘mañ.
Ur wech diskuizhet e-pad ur mare mat e Breizh, e prientin sur mat ur veaj all.
Kelaouiñ a rin ac’hanoc’h…
Ken ‘benn nebeut neuze er vro !
Kenan
Dimerc’her e oan degouezhet e Pichilemu. A-boan pozet ma fakadoù e ti divent Jose-Luis (en ma c’hambr ez eus 4 gwele ha n’ouzon ket pet kambr a zo e gwirionez. En em c’houlenn a ran hag-eñ n’eo ket un ostaleri gozh) on bet ambrouget gantañ e kreiz-kêr. Debret hon eus empanadas eus ar c’hentañ ha bet omp o kavout unan eus e vignoned en e var/resto sushi. Chomet omp du-se e-pad ur mare mat, gant an daou geneil ha mestr an ti. P’hon eus kuitaet ar stal e oa evit prenañ peadra da genderc’hel an nozvezh e ti Juan-Luis. Plijadur a zo bet !
Hiziv on bet o tennañ poltriji eus bord ar mor.
Setu penaos eo Pichilemu : ur gêriadenn vihan (15 000 den) gant ur bern ostalerioù evit lojañ ar miliadoù a surferien a zeu e-pad an hañv. An draezhenn a zo gant traezh du ha gwagennoù eus ar c’hentañ a zo evit ar surferien !
Touristel-mat e tle bezañ e-pad an hañv. Gouleier a zo staliet war an draezhenn.
Dek devezh on chomet e Valparaiso.
Mat-tre eo tremenet an amzer-se, pe ‘vefe gant ar vandennad studierien (chomet on ganto betek ar Gwener) pe gant Victor. Plijus eo gellet bezañ gant tud ar vro, komz eus a bep seurt traoù, hag eskemmañ gouizhiegezh (sonerezh, yezhoù…).
Lakaat a ran ul liamm m’ho p’eus c’hoant gwelet un eil diaporama war Valparaiso.
https://picasaweb.google.com/104097133801309703720/EilRummadFotoiouEValparaiso?authkey=Gv1sRgCMeSqImqiZjgzwE#slideshow/5605995833171868850
Dilun eo bet mouezhiet raktres HidroAysen. Manifestadegoù a zo bet un tamm pep lec’h er vro evit talañ ouzh an divizh. 60 % eus ar boblañs a vefe a-enep sevel ar stankelloù divent war stêrioù Patagonia. Setu ur pennad, e galleg, evit kompren gwelloc’h ar gudenn.
http://www.google.com/hostednews/canadianpress/article/ALeqM5hQVB53EB9CROUvBd5FnWWPXWw_FQ?docId=6803683
Dimeurzh em eus graet ur gouel diwezhañ gant ar re yaouank. Div blac’h eus Bro-C’hall a oa aze ivez, degemeret ganto c’hoazh dre g/couch surfing. Setu un nebeud fotoioù. Lod anezho o deus c’hwezhet er beuz !
Luiggi
Jorge
Warc’hoazh e tiskouezin deoc’h penaos ez eo al lec’h ma ‘maon bremañ. Pichilemu eo anvet, ur gêr anavezet gant ar surferien evit he gwagennoù hag he zraezh du.
Dibaoe disul da noz emaon e Valparaiso.
Degemeret on e ranndi studierien plijus-tre. An holl eus ar genlojerien (tri a zo er mare-mañ met betek 5 e c’hellont bezañ) a zo eus Chillan, un tamm muioc’h e Su ar vro.
Ur gambrig bihan-tout am eus, dindan ar skalieroù !
Met er mare-mañ ez eus un nebeud kudennigoù en ti : ket a zour tomm, betek dec’h ne oa ket gaz… neuze en em azaseer ouzh al lec’h !
Bet omp oc’h ober troiadoù e straedoù, porzh ha torgennoù Valparaiso. Kaer eo.
Ne zeuan ket a-benn da lakaat un diaporama er bajenn-mañ, met klikit war al liamm dindan evit gwelet un nebeut skeudennoù eus ar gêr.
Souezhus a-walc’h eo en em gavout gant un tropellad 20 bennak a dud o redek hag o kanañ evit an euskareg, war un dorgenn eus Bro-Chile !
Rak dec’h e oa aozet gant div blac’h eus Bro-Euskadi, kelennerezed e Bro Chile, ur C’horrika bihan. Lakaet em eus amzer da gavout al lec’h emgav, ne c’helle den ebet a-douez an dud am eus goulennataet lâret din pelec’h e oa ar Plaza vasca. A benn ar fin eo e lein ar Cerro San Cristobal, ul lec’h kaer.
Kavet e vez war ar blasenn-se, dirak ur chapelig, ur wezenn derv bet diwanet diwar ur vezenn eus gwezenn Gernika, e Bro Euskadi.
A-raok loc’hañ em eus kemeret ur poltred eus delwenn ar werc’hezh, a zo e penn uhelañ an dorgenn.
Ha setu kroget an dud da redek ha da ganañ. Euskariz, ur bern anezho studierien e Chile (Santiago, Valparaiso pe c’hoazh La Celena), pe c’hoazh Chilianed diskennidi Euskariz a oa neuze o reiñ lañs d’ar yezh.
Diskennet eo bet tout an dorgenn hag echuet an droiad e park ar c’hizelladennoù, e lec’h ma oa bet prientet ur pik-nik.
Digwener e oan bet betek Maipu, e lec’h ez eus un Templ katolik divent. 
Souezhus eo gwelet ar bannieloù-se e diabarzh an Iliz.
Dirak an Iliz-se e oa ur bern soudarded, o prientiñ un arvest. D’ar sadorn e oant o vont d’ober ur pezh-c’hoari war Emgann Maipu (La Batalla de Maipu). E 1818 e oa bet an emgann a-bouez-se evit dizalc’houriezh Chile. Eus un tu e oa Arme Chile, skoazellet gant brezelourien eus an Andez, hag eus an tu all tropelladoù Roue Bro-Spagn. Gounezet e oa bet neuze gant ar Suamerikaned.
Diwezhatoc’h e oan bet o krapat ar Cerro San Cristobal, un dorgenn 860 metrad uhelder. Kaer eo al lec’h, gant meur a bark pe a jardin ispisial.
Ar jardin Japanat
Gweledva Santiago. Gwelet e vez, a-gleiz eus ar skeudenn, Costanera Center, un tour a zo o vezañ savet hag a dlefe bezañ 300 metrad uhelder.
Dec’h e oan bet oc’h ober un tamm tro en ur mirdi nevez. Ur bloaz ‘zo eo digoret el Museo de la memoria y los derechos humanos. Dedennus-tre eo dre ma vez displeget ar bloavezhioù diktatouriezh dre ur bern doareoù. Fotoioù a zo ur bern, met ivez skritelloù stourm, prezegennoù diskleriet gant an tudennoù pennañ (hini diwezhañ Salvador Allende da skouer, pa groge arme Pinochet da vombezañ Palez La Moneda, devezh an taol-stad, d’an 11 a viz Gwengolo 1973) pe e vefe er radio pe er skinwel. Ur bern titouroù a zo, ha dreist-holl, ur bern testenioù eus an dud o deus bet da c’houzañv gouarnamant Augusto Pinochet. Tud lazhet, jahinet ha bac’het a zo bet ur bern, ha lod all kollet ar roud anezho. Ouzhpenn 3000 den a zo bet lazhet pe aet diwar wel etre 1973 ha 1990.
Siwazh ne oa ket tu kemer skeudennoù en diabarzh, setu ur skeudenn vil eus an diavaez…
Goude-se e oan tremenet er Cementerio General. Ur vered divent eo (hentoù a zo evit ar c’hirri ha gwerzhet e vez boued hag evaj en diabarzh), gant bezioù bras-tre, met n’int ket eus ar re vravañ hervezon.
Du-se emañ ar blakenn en enor d’an holl re marv e-pad ar bloavezhioù diktatouriezh.
Pennadig am boa skrivet dimerc’her
Ma lojer en doa da vanifestiñ dec’h. Gant ur strollad mignoned e oamp bet neuze nepell eus Palez ar Gouarnamant (La Moneda) hag adkavet kantadoù a dud (n’ouzon ket resis pet e oamp). An holl a oa a unvouezh evit nac’h ur raktres sevel ur stankell war unan eus stêrioù Patagonia. Pal ar stankell a vo produiñ tredan evit Santiago ha norzh ar vro, neuze e vo ret astenn ouzhpenn 2000 km orjal. N’on ket c’hoazh arbennik war ar jeu, ret din lenn an titouroù zo bet roet din !
Setu un nebeud skeudennoù.
Ur gudennig am eus bet gant internet. Setu ar pennad am boa skrivet dimeurzh.
Dibaoe dilun emaon e ti Carlos, hag e vamm Mena (Filomena). Dreist eo an degemer ! (un hanter eur ‘zo e oan o tebriñ ar boued he doa prientet din ar vamm dec’h da noz evit el almuerzo !)
Carlos a labour diwezhat, neuze ne welan anezhañ nemet e fin an abardaez. Met neuze ez an ma-unan da zizoleiñ Santiago, diwar e guzulioù ha re Lonely Planet (a zo mat-tre).
Setu un nebeud traou am eus gwelet.
Ur blasenn vihan, Barrio Concha y Toro, nepell eus an ostaleri ma oan lojet a-raok.
Ur feunteun a zo.
Hag ur barzh… P’am eus goulennet outañ ha gellout a raen kemer ur poltred en deus respontet : « Ya, en eskemm eus ur banne kafe », evit farsal e oa. Met benn ar fin e oa dedennet-mat e prenfen digantañ unan eus e varzhonegoù… Goude bezañ tabutet em eus prenet ur follenn varzhonegoù neuze, gant ar pezh a oa e ganin e foñs ma doug-moneiz (60 peso marteze, nebeutoc’h eget 10 santim). Ret vo din lenn ar pezh en deus skrivet neuze, mod-kozh, gant ur mekanik skrivañ !
Dec’h e oan bet o welet unan eus tri zi Pablo Neruda. Sur mat ez in da welet unan all e Valparaiso, rak dreist a-walc’h e oa hennezh dija ! La Chascona eo anvet an ti, evel ma rae Neruda eus e drede gwreg a veve gantañ aze.
La Chascona a zo kement a blev spulfet, dre ma oa krignenn Matilda en dizurzh bepred ! Ne oa ket tu kemer fotoioù en diabarzh, siwazh peogwir eo dedennus mat. Ar skrivagner en deus penn da benn ijinet an doare sevel ha kinklañ an ti. Neuze e kaver ennañ (pe enno rak meur a zi a zo) : ur sal debriñ hag un davarn doare bourzh ur vag da vad ; pladoù, gwer, delwennoù, kizeladennoù… adkaset gantañ eus e veajoù a-dreuz ar bed ; un tremen kuzhet en un armel ; tri zavarn disheñvel, a veze implijet hervezh an istim en doa evit an dud pedet… pe c’hoazh e lec’h preder ha lenn, gant plañchod distabil hag a vlej dindan pazioù an dud, evel ma vefe c’hoazh e-barzh ur vag (daoust dezhañ bezañ displijet gant ar veajoù e bigi!).
Mod-all, ur bruderezh am eus kavet farsus, deoc’h da c’houzout.
Ha goude bezañ gweladennet un tamm karter Bellavista on tremenet dre ar Parque Forestal a-raok distreiñ er c’hreiz.
Bremaik e tilojan eus an ostaleri evit mont da di Carlos.
Dec’h e oamp bet, tri ac’hanomp, er marc’had en doa komzet din Carlos eus outañ. Ur paotr eus Kolombia, a oa o kousket er memes kambr ha me, ‘zo deuet da weladenniñ ganeomp la feria Bio Bio. Digredus eo !
Ur seurt karter eo e lec’h ma vez kavet peptra (urzhiaterioù, dilhad, levrioù met ivez sizhailhoù medisinerezh, rodoù oto, binviji a bep seurt…) gwerzhet er straed pe ‘barzh hangarioù divent. Ur seurt marc’had Sant-Mikel e Brest met e kalz kalz brasoc’h ha dizhurzhietoc’h. Sañset eo marc’hadourezh reizh, met seblantout a ra bezañ kalzik a draou laeret !
N’em eus ket paket skeudennoù evit diwall na vefe ket skrapet diganin ma benveg…
Ha war-lerc’h omp tremenet en ur marc’had artizanel, e lec’h ma kaver traoù klaseloc’h…
Kendalc’het hon eus an droiad en ur pignat ar Cerro Santa Lucia, un dorgenn gaer e kreiz-kêr Santiago.
Erruet el lein, ez eus tu gwelet Santiago kelc’hiet gant menezioù. Menezioù an Andez a vez gwelet war ar skeudenn gentañ.
beajkenan 